It-triq lejn elezzjonijiet Ewropej (1951–1979)

L-idea li jiġu eletti MPE kienet ilha teżisti sa mill-ħolqien tal-ewwel istituzzjonijiet Ewropej. Madankollu, dan ma sarx realtà fl-ewwel deċennji tal-Komunitajiet Ewropej: ir-rappreżentanti nazzjonali fl-Assemblea Komuni tal-Komunità Ewropea tal-Faħam u l-Azzar (KEFA) kienu jinħatru mill-membri tal-parlamenti nazzjonali, u mhux jiġu eletti għall-assemblea Ewropea direttament.

Madankollu, għan-nies komuni u għall-Komunità Ewropea bikrija kien importanti li l-pubbliku jkun involut demokratikament fid-deċiżjonijiet fil-livell Ewropew. Għalkemm l-Istati Membri ma approvawx l-abbozz ta’ konvenzjoni tal-1960 għal elezzjonijiet diretti (ir-“Rapport Dehousse”), l-attiviżmu taċ-ċittadini għall-elezzjonijiet kompla. Movimenti pro-Ewropej għamlu kampanji biex jiġu organizzati elezzjonijiet fil-livell Ewropew, u wħud minnhom organizzaw assemblej u votazzjonijiet Ewropej fittizji. Fis-snin sebgħin, xi ċittadini bagħtu petizzjonijiet lill-Parlament Ewropew. Fihom appellaw għal promozzjoni akbar tal-elezzjonijiet Ewropej. 

Fl-1975, il-Parlament adotta rapport dwar l-organizzazzjoni ta’ elezzjonijiet Ewropej diretti. Ir-Rapport Patijn, imsemmi wara l-MPE Netherlandiż Schelto Patijn li abbozzah, serva bħala l-bażi għall-approvazzjoni sussegwenti tal-elezzjonijiet Ewropej mill-Istati Membri.

Fl-1976, il-Ministri għall-Affarijiet Barranin tal-Istati Membri ffirmaw l-Att Elettorali Ewropew, fejn qablu li jorganizzaw elezzjonijiet diretti għall-Parlament Ewropew. L-elezzjonijiet kellhom isiru fl-istess perjodu fil-pajjiżi kollha tal-Komunità Ewropea, għalkemm l-Istati Membri kienu ħielsa li jiddeċiedu s-sistema eżatta tal-votazzjoni f’pajjiżhom. 

Isma' l-podcast (EN)

Il-Parlament Ewropew huwa l-post fejn jinġabru nies minn madwar l-Unjoni Ewropea kollha biex jiddiskutu u jiddeċiedu dwar kwistjonijiet importanti li jħallu impatt fuq il-ħajja ta’ kulħadd. Iċ-ċittadini għandhom rwol kruċjali f’dan il-proċess. Id-demokrazija tibda minna, il-poplu.