Wirja
Insawru l-Ewropa
L-Unjoni Ewropea tespandi: Is-snin 2000
Millennju ġdid fl-Ewropa
Issieħbu tnax-il pajjiż ġdid, l-euro sar valuta legali, u ġie ffirmat it-Trattat ta’ Liżbona. Dan kien deċennju kbir għall-UE – x’inhuma l-avvenimenti li mmotivaw lill-Ewropej jivvutaw għall-Parlament il-ġdid tagħhom?
2004: L-akbar tkabbir tal-Ewropa
Is-sena 2004 rat l-akbar numru ta’ pajjiżi jivvutaw f’elezzjoni tal-UE. Ħadu sehem 10 pajjiżi ġodda: Ċipru, ir-Repubblika Ċeka, l-Estonja, l-Ungerija, il-Latvja, il-Litwanja, Malta, il-Polonja, is-Slovakkja u s-Slovenja.
Kien hemm ħafna affarijiet fuq l-aġenda tal-UE. Il-Karta tad-Drittijiet Fundamentali tal-UE, ipproklamata solennement f’Diċembru 2000, stabbilixxiet id-drittijiet u l-libertajiet fundamentali taċ-ċittadini.
Sadanittant, l-euro daħal fiċ-ċirkolazzjoni fl-2002 fi 12-il Stat Membru.
Dawk li jfasslu l-politika kellhom l-intenzjoni li jgħammru lill-Unjoni biex tkun lesta għall-isfidi futuri. It-Trattat ta’ Nizza (2001) irriforma lill-istituzzjonijiet tal-UE biex jippermettu t-tkabbir tal-UE lejn l-Ewropa tal-Lvant. Minbarra hekk, dan it-Trattat kompla jestendi s-setgħat ta’ kodeċiżjoni tal-Parlament Ewropew. Il-MPE kellhom rwol attiv fil-ħidma tal-Konvenzjoni Ewropea li pproduċiet abbozz ta’ Kostituzzjoni għall-UE f’Lulju 2003, li minnu, wara r-riżultat negattiv ta’ żewġ referenda f’Mejju u f’Ġunju 2005, ħareġ it-Trattat ta’ Liżbona.
2009: Niffaċċjaw il-kriżi finanzjarja
L-elezzjonijiet tal-2009 inkludew lill-Bulgarija u r-Rumanija, li ssieħbu fl-UE fl-2007.
Minħabba l-kriżi finanzjarja globali tal-2008, l-affarijiet ekonomiċi kienu l-kwistjoni ewlenija tal-kampanja, segwita mill-impjiegi u l-protezzjoni soċjali. Il-ġlieda kontra t-tibdil fil-klima u l-kwistjonijiet tal-enerġija wkoll ħeġġew lill-votanti joħorġu jivvutaw.
Il-Parlament approva d-Direttiva dwar is-Servizzi, bl-għan li jiżviluppa s-suq uniku tal-UE għas-servizzi. Il-MPE, bħala rappreżentanti tal-vuċi taċ-ċittadini, kellhom rwol essenzjali biex jintlaħaq ftehim dwar dan is-suġġett kontroversjali.
Sadanittant, ġie ratifikat it-Trattat ta’ Liżbona, u b’dan daħlet fis-seħħ il-Karta tad-Drittijiet Fundamentali. Issa kien meħtieġ li l-Istati Membri tal-UE jimplimentaw it-Trattat.
F’dan il-perjodu, il-Parlament Ewropew nieda premjijiet li jrawmu spirtu Ewropew aktar b’saħħtu. Il-Premju Ċinematografiku LUX beda fl-2007, u jixħet dawl fuq films li jmissu l-polz tad-dibattitu pubbliku Ewropew. Il-Premju taċ-Ċittadin Ewropew, imniedi fl-2008, jirrikonoxxi kisbiet eċċezzjonali ta’ xi Ewropej. Il-Premju Karlu Manju għaż-Żgħażagħ Ewropej ilu mill-2008 jingħata lil proġetti mmexxija miż-żgħażagħ li jippromwovu l-fehim Ewropew u internazzjonali.
