Wirja
Insawru l-Ewropa
Id-demokrazija Ewropea fl-azzjoni mill-1979 ’l hawn
Kif il-voti taċ-ċittadini biddlu l-Ewropa
Minn komunità ta’ wara l-gwerra magħmula minn sitt pajjiżi ddedikati li jiżguraw il-paċi u l-prosperità ekonomika fl-Ewropa, l-Unjoni kibret għal 27 Stat Membru u ħabbtet wiċċha ma’ sfidi li jvarjaw minn kriżijiet ekonomiċi sat-tibdil fil-klima.
In-nies, l-oġġetti, is-servizzi u l-kapital jistgħu jiċċaqilqu liberament bejn l-Istati Membri kollha tal-UE, u aktar minn 440 miljun ċittadin jistgħu jistabbilixxu ruħhom kull fejn jixtiequ fl-UE. Kull pajjiż tal-UE huwa obbligat li jittratta liċ-ċittadini ta’ pajjiżi oħra tal-UE eżattament bl-istess mod bħaċ-ċittadini tiegħu stess fir-rigward tal-impjiegi, is-sigurtà soċjali u t-tassazzjoni.
L-UE hija l-akbar blokk kummerċjali fid-dinja u l-euro hija t-tieni l-aktar munita użata fil-kummerċ fid-dinja. Hija l-akbar esportatur fid-dinja ta’ oġġetti manifatturati u servizzi, hija l-akbar suq ta’ importazzjoni għal aktar minn 100 pajjiż, u tipproteġi lill-konsumaturi permezz ta’ politiki tal-UE b’saħħithom.
L-UE u l-Parlament Ewropew huma atturi importanti fix-xena globali wkoll. L-UE tikkoopera ma’ gvernijiet f’150 pajjiż sieħeb madwar id-dinja li qiegħda tiżviluppa, kif ukoll mas-soċjetà ċivili u ma’ organizzazzjonijiet internazzjonali. B’mod kollettiv, l-UE u l-Istati Membri tagħha huma l-akbar donatur ta’ għajnuna umanitarja fid-dinja. Kull sena l-UE tipprovdi ikel, kenn, protezzjoni, kura tas-saħħa, u ilma nadif lil aktar minn 120 miljun vittma ta’ diżastri u kunflitti f’aktar minn 80 pajjiż.
Il-Parlament Ewropew huwa mgħammar sew biex jirrappreżenta l-interessi taċ-ċittadini tal-UE. Is-setgħat tiegħu ssaħħew gradwalment permezz tat-Trattati tal-UE u issa jkopru l-leġiżlazzjoni, il-baġit u r-rwoli superviżorji. B’hekk, illum il-ġurnata l-vuċi taċ-ċittadini tittieħed inkunsiderazzjoni fit-teħid ta’ deċiżjonijiet tal-UE aktar minn qatt qabel.
Fi ħdan l-Istati Membri, l-Uffiċċji ta’ Kollegament tal-Parlament Ewropew jinvolvu ruħhom maċ-ċittadini u l-partijiet ikkonċernati, jieħdu ħsieb il-kuntatti mal-media nazzjonali, reġjonali u lokali, u jipprovdu appoġġ lill-MPE fl-eżerċizzju tal-mandat uffiċjali tagħhom fil-pajjiż. Fl-Istati Uniti u fir-Renju Unit, l-Uffiċċji ta’ Kollegament jipprovdu punt ta’ referenza biex jiġu segwiti l-iżviluppi fl-Unjoni Ewropea, speċjalment mill-perspettiva tal-Parlament Ewropew.
Illum il-Parlament jidher ferm differenti minn kif kien fl-1979. Ir-rappreżentazzjoni tan-nisa żdiedet b’mod kostanti. Fl-2019, 41% tal-MPE eletti kienu nisa, meta mqabbel ma’ 16% fl-1979. Hemm aktar gruppi politiċi, li jirriflettu diversità ta’ fehmiet, kif ukoll aktar MPE li jagħżlu li ma jkunux affiljati.