Taispeántas
Do Pharlaimint na hEorpa, tá tógáil na hEorpa aontaithe bunaithe ar luachanna agus prionsabail riachtanacha a aontaíonn na tíortha agus na pobail: urraim do dhínit an duine, don tsaoirse, don daonlathas, don chomhionannas, don smacht reachta agus do chearta bunúsacha, go háirithe cearta na mionlach.
Fiú sular toghadh í in 1979, chuir an Pharlaimint cearta bunúsacha chun cinn agus í ag feidhmiú a cumhachtaí. Do na Feisirí, is bealach é seo chun an cuspóir polaitiúil a dhaingniú, is é sin Eoraip aontaithe a thógáil. Le tríocha bliain anuas, bhí díospóireacht bhliantúil ag an bParlaimint agus ghlac sí rún maidir le staid na gceart bunúsach san Aontas Eorpach.
Tá na Feisirí ag iarraidh ar an Aontas Eorpach cearta na saoránach a chódú le fada. Creideann siad go bhfuil sé tábhachtach go mbeadh eolas ag cách ar na cearta agus na saoirsí bunúsacha a ráthaítear dóibh. Dá bhrí sin, áitíonn siad gur cheart go mbeadh córas achomhairc ann chun sárú a d’fhéadfadh a bheith ann a thuairisciú.
Go luath sna 2000idí, bhí ról lárnach ag ionadaithe na Parlaiminte nuair a bhí Cairt um Chearta Bunúsacha an Aontais Eorpaigh á dréachtú. Den chéad uair riamh, bhí Feisirí Eorpacha ag obair i gcomhpháirt le teachtaí parlaiminte náisiúnta, ionadaithe na gCeannairí Stáit nó Rialtais agus an Coimisiún Eorpach chun téacs bunreachtúil a dhréachtú.
Tháinig cairt as an bplé sin. Tugtar cur síos inti ar na luachanna agus cearta coiteanna atá bunaithe ar phrionsabail riachtanacha áirithe: dínit an duine, saoirsí bunúsacha, comhionannas idir daoine, dlúthpháirtíocht, saoránacht agus ceartas, an daonlathas agus an smacht reachta.
Le déanaí, agus imní uirthi faoi mheath daonlathach agus faoi chreimeadh luachanna an Aontais Eorpaigh de réir a chéile i roinnt Ballstát, thacaigh an Pharlaimint le smachtbhannaí. Chruthaigh sí grúpa freisin chun faire a dhéanamh ar an daonlathas, an smacht reachta agus cearta bunúsacha san Aontas Eorpach.