Wirja
Huwa diffiċli li wieħed jemmen li f'din id-dar tal-familja li tidher ordinarja, imwarrba iżda xorta qrib iċ-ċentru attiv ta' Pariġi, żviluppaw il-futur tal-Ewropa u postha fl-affarijiet globali. Dan huwa l-post fejn ġiet stabbilita l-viżjoni ta' paċi u ta' għaqda Ewropea ta' Jean Monnet. Monnet xtaq li jara d-dar tal-familja tiegħu trasformata f'post iddedikat biex jilqa' liż-żgħażagħ, u l-Parlament Ewropew onora dak l-impenn billi biddel id-dar ta' Houjarray f'post ta' tifkira u interazzjoni miftuħ għall-viżitaturi: post għat-tagħlim, id-diskussjoni u l-medjazzjoni. Huwa l-post ideali biex wieħed jiskopri l-ambjent li fih għex u ħadem wieħed mill-arkitetti tal-Unjoni Ewropea tal-lum.
Dar Jean Monnet inxtrat mill-Parlament Ewropew għall-ġenerazzjonijiet futuri f'Diċembru 1982. Din id-dar mhux biss tesplora l-karriera pubblika u l-impenji ta' dan l-istatista importanti iżda turi wkoll il-ħajja personali ta' dan ir-raġel, tressaq lin-nies b'mod dirett lejn ix-xogħol ta' Monnet u tesplora l-importanza tiegħu fl-Ewropa tal-lum.
L-għan ta' dan il-bini il-binja mhuwiex biss li jiġu ppreservati l-oriġini tal-Unjoni Ewropea: huwa post ta' ispirazzjoni u biex il-futur tal-Ewropa jiġi kkunsidrat bħala entità magħquda. Hekk kif jgħaddi aktar żmien fis-seklu 21 b'futur aktar inċert u diffiċli, huwa importanti li nżommu f'moħħna l-messaġġi ta' dan l-ispazju storiku. Għalhekk hemm impetu ġdid fid-Dar Jean Monnet biex jitkabbar l-għarfien tal-legat ta' dan il-missier fundatur tal-Ewropa billi jinxterdu l-valuri tiegħu ta' paċi u solidarjetà fost udjenza wiesgħa u biex tintwera l-konnessjoni bejn l-ambizzjonijiet ta' Monnet u x-xogħol li qed isir illum fuq livell Ewropew. Minbarra l-attivitajiet ġodda li qed jiġu organizzati u n-numru ta' avvenimenti li qed jiġu ospitati għall-pubbliku, il-bini qed jiftaħ il-bibien tiegħu bħala spazju biex il-Parlament Ewropew jiltaqa' mal-mexxejja u biex jinbena l-futur tal-Ewropa hawnhekk fil-post fejn twieldet l-integrazzjoni Ewropea.
